Бір адам бір күні біреуге хабарласып тұрған екен. Қасында тұрған кісі таңырқап:
— Кімге хабарласып тұрсың? — деп сұрайды.
Сонда әлгі адам:
— Рамазан айына хабарласып тұрмын, — дейді.
Қасындағысы түсінбей:
— Не үшін? — деп қайта сұрайды.
Сонда ол терең күрсініп:
— Мен Рамазан айында иманымды толтырып алған едім. Жүрегім жұмсарып, құлшылыққа деген ықыласым артқан болатын. Бірақ кеше Рамазан аяқталып, сол күйім Рамазанның ішінде қалып кеткендей болды. Енді соны қайтара алар ма екен деп хабарласып тұрмын… — дейді мұңайып.
Сонда қасындағы адам жымиып:
— Ей, бауырым, Рамазан енді келесі жылы, Алла қаласа, қайта келеді ғой. Сен уайымдама. Рамазан тек уақыт емес, ол — мүмкіндік. Ал мүмкіндік тек бір аймен шектелмейді. Нәпіл оразалар бар, қосымша құлшылықтар бар, иманды күшейтетін амалдар көп. Ең бастысы — тақуалық жолдан тайма.
— Егер осы жолдан айнымасаң, Алла қаласа, келесі Рамазанға жеткенде бұрынғыдан да мықты, бұрынғыдан да иманды болып шығасың, — деп жұбатады.
ТҮЙІН: Рамазан — тек бір айлық құлшылық емес, ол — жүректі тәрбиелейтін мектеп. Нағыз жетістік — сол айда алған рухани күшті жыл бойы сақтай білу. Рамазан кетсе де, иман кетпеуі керек.
Алла бізді әрдайым тура жолдан айырмасын, келесі Рамазанға аман-есен, иманымызды нығайтып жетуді нәсіп етсін.
Нұрлы САРТАЙҰЛЫ,
mazhab.kz сайтының әкімшілігі
