«ФИЛ» СҮРЕСІ
«ФИЛ» СҮРЕСІ
21.07.2017 11:16
5180
0

«Фил» сүресі Меккеде түскен. Сүреде піл иелерінің қиссасы баян етіледі. Олар Қағбаны бұзуға бет алады. Бірақ Алла Тағала оларды өз қаруымен жойып жіберді. Осылайша Жаратқан Ие өзінің үйін олардың жаулап алуынан қорғап қалды. Абраһаның әскері ең әлсіз мақлұқтар арқылы жермен-жексен болып жойылды. Ол құстар тұмсығы мен аяғына кішкене тас алып келді. Алайда, бұл тастар қорғасын оқтан да опатты боп тиді. Аталған тарихи оқиға пайғамбарымыз Мұхаммед ибн Абдулла (с.ғ.с.) дүниеге келген 570 жылы болды. Айтулы оқиға – пайғамбарымыздың (с.ғ.с.) елшілігін растайтын ең үлкен ирхасаттардың бірі.

بسم الله الرحمن الرحيم

أَلَمْ تَرَ كَيْفَ فَعَلَ رَبُّكَ بِأَصْحَابِ الْفِيلِ

1.Раббыңның піл иелеріне не істегенін көрдің бе?

Уа, Мұхаммед! Қасиетті Қағбаға жаугершілік ниетімен келген піл иелерінің жағдайы жайлы саған хабар жетті ме?

Риуаятта: «Йемен патшасы Абраһа Сана қаласында шіркеу тұрғызады. Ондағы ойы – қажыларды шіркеуге тарту. Кинана руынан бір кісі түнделетін келіп шіркеуді мазақ етіп, ішін нәжістеп, қабырғаларын ластап кетеді. Ашуына мінген Абраһа Қағбаны бұзамын деп ант етеді. Ол піл мінген үлкен әскерімен Меккеге келеді. Әскер Меккеге таяп келгенде, қала тұрғындары қорқып тауға қашады. Абраһа әскеріне қарсы Алла Тағала қара құстарды жібереді. Құстар тұмсығы мен екі аяғында бір-бір түйір майда тас алып келеді. Құстар лақтырған майда тастан әскер тып-типыл болып, жансыз денелері жерде сұлап жатты. Бұл басқаларға ғибрат оқиға болды. Сонымен бірге, пайғамбарлықтан бұрын болған ирхасат оқиға еді.

أَلَمْ يَجْعَلْ كَيْدَهُمْ فِي تَضْلِيلٍ

2.Олардың айла-қулықтарын адасуға айналдырмады ма?

Оларды жойып, Қағбаны бұзбақ болған әрекеттерін зая етті.

وَأَرْسَلَ عَلَيْهِمْ طَيْرًا أَبَابِيلَ

3.Және де оларға құстарды топ-тобымен жібермеді ме?

Оларға топ боп келген құстарды жіберді. Құстар әскерді жан-жақты қоршап алды.

تَرْمِيهِمْ بِحِجَارَةٍ مِنْ سِجِّيلٍ

4.(Құстар) оларды балшықтан күйдірілген тастармен атқылады.

Құстар әскерді тасқа айналған балшықпен атқылады. Ол балшық оқ сияқты тиген адамды өлтіріп жатты.

فَجَعَلَهُمْ كَعَصْفٍ مَأْكُولٍ

5.Сөйтіп оларды дәні мүжілген сабандай етті.

Оқ тиген әскер ағаштан жерге үзіліп түсіп, мал жеп тезек етіп кеткен жапырақ секілді күйге түсті. Бұл қиссада Алла Тағаланың Қағбаны құрметті еткендігін және Құрайышты жаудан қорғағаны айтылады. Сондықтан, Құрайыш Алла Тағалаға құлшылық етіп, шүкіршілік жасауға міндетті. Піл оқиғасы Алла Тағала жауларынан есе алуының ғажайып көрінісі бар. Бахр кітабында: «Бұл үлкен әскердің жойылуы пайғамбарымыздың (с.ғ.с.) дүниеге келген жылы орын алды. Піл оқиғасында пайғамбарлықтың ирхасаты. Өйткені, бұл оқиғаны дүйім жұрт өз көзімен көріп, куә болды. Алла Тағала үлкен әскерді, әдетте ешбір зияны жоқ әлсіз құстардың көмегімен жойды[1]»  деп тәпсірленген.+

 

 

[1]    Бахр Мухит 8/512

 

Серікбай қажы ОРАЗ

0 пікір