ӘБУ ХАНИФА ЖАЙЛЫ ҒАЛЫМДАРДЫҢ ПІКІРІ

«Әбу Ханифа заманының озық ойлы, білгір адамы еді»

( Меккелік Ибраһим)

«Әбу Ханифаның: «Менде хадис ілімінен бірнеше сандық бар. Мен солардың ішінен пайдалану үшін бір азырағын ғана шығардым» дегенін естідім»

(Яхиа ибн Наср)

«Әбу Ханифадан өткен фақиһ ғалымды және одан өткен ықыласты намазхан адамды көрмедім» Уакиъ ибн Аль Жаррах

(имам Шафиъдың ұстазы)

«Кімде кім фиқһ ғылымын үйренгісі келсе Әбу Ханифа мен оның серіктерінің жолын ләзім тұтсын. Өйткені адамдардың баршасы фиқһ ілімінде Әбу Ханифаның алдында оның жанұясы сияқты»

(Имам Шафии)

«Әбу Ханифа келіп фиқһты ара жігін ажыратып адамдардың көкірегін оятпағанда, олар сол күйде фиқһ ілімін білместен ұйықтап жата берер еді»

(Наср ибн Шамил)

«Әбу Ханифамен бес жыл тұрдым. Сондағы менің байқағаным: Әбу Ханифа қашан көрсең үндемей жүрер еді. Егер фиқһ жөнінде бір мәселе сұрала қалса ашылып сөйлегені соншалық - тасқындаған селдей ағыза жөнелер еді»

(Жаъфар ибн Рабиъ)

«Ағмаш деген ғалым егер фиқһ жайлы күрделі мәселе көтеріле қалса, дереу Әбу Ханифаға жіберер еді»

( Жарир)

«Әбу Ханифадан өткен тақуа зейінді адамды көрмедім»

(Язид)

«Мыңдаған ғалым-машайықтарға жолықтым. Солардың ішінен үшеуінің зейініне, біліміне таң қалдым. Олардың бірі Әбу Ханифа болатын»

(Харижа ибн Мусъаб)

«Біздің заманымызда Меккеге келген адамдардың ішінен Әбу Ханифадан көбірек намаз оқитын адам болмады»

(Суфиан ибн Ғуайнаһ)

«Түннің бір уағында Меккеге тауап етейін деп келгенімде тауапшылардың арасынан үнемі Әбу Ханифаны көретін едім»

(Мутиъ)

«Әбу Ханифа намазды көп оқығаны соншалық замандастары оны «қазық» деп атар еді»

(Әбу Ғасим ән-Нәбил)