Кеше ғана қасиетті парызын орындап келген өкіл имам Бертімұратов Жолдас қажы Павлодар қалалық «Ирбис» телеарнасының «Иман нұры» бағдарламасы арқылы Исламның 5 парызының бірі болған қажылық туралы сұхбат берді. Өкіл имам Жолдас қажы Қоспақұлы сұхбатында қажылық жасаудың парыз екендігі туралы айта келе биылғы жылғы қажылық маусымының ерекшелігі, еліміз, облысымыздың Меккеге барған мұсылмандардың Алла Тағаланың міндет еткен қасиетті парызын толығымен орындап, түгелдей аман –есен елін оралғанын айтты. Сонымен қатар қажылық-қыдыру емес, Жаратқанның парызы екендігі туралы түсіндірді. Өкіл имам өз сөзінде:
-Жалпы, қажылық деген – сән-салтанатымен серуендеу, қызықтап қыдыру емес, қиындығы мен машақаты қыруар, орындалуы ауыр, әрбір мұсылманның жауапкершілігі жоғары парызы әрі Жаратқан Алланың сынағы. Сондықтан қажылық – адамды сабырлылық пен төзімділікке, шыдамдылық пен шүкіршілікке, кішіпейілдік пен ізгілікке тәрбиелейтін теңдесі жоқ құлшылық рәсімі. Ислам ғалымдары қажылықты дұрыс атқарған адамның бақи дүниедегі сыйы жәннат екенін, ал фәни дүниедегі сыйы ретінде үзілмейтін ризық пен кедейліктің ауылынан алыс болуы, сонымен қатар күллі күнә-кемшіліктердің кешіріліп, мүминнің анадан жаңа туған сәбидей пәк қалыпқа түсетіні жайлы Мұхаммед(с.ғ.с) Пайғамбар хадистерінде айтылғандығын насихаттайды. Міне, сондықтан Құдайдың қасиетті еткен қаласына қадам басып баратын азаматтарымыз өздерінің амандығымен бірге еліміздің де береке-бірліген тілей отырып, асқан ұйымшылдықпен барып келуде»,-деді.
Мұсылманның бес парызының бірі саналатын осы бір парызды өтеу – әркімге бұйыра бермейтін мүмкіндік. Биыл сол мүмкіндікке қол жеткізу үшін министрлік өкілдерімен бірлесе, еліміздің бас мүфтиі Серікбай қажы Сатыбалдыұлы өзі басқарып барып, 3 мың квота алып берді. Үш мың квотаны Қазақстан мұсылмандары діни басқармасы 18 туристік фирмаға бөліп берді. Елімізде қажылыққа баруға кез келген азамат кезексіз және бірнеше мәрте бара алады. Мәселен, 210 млн мұсылман тұратын Индонезияда азаматтар қажылыққа бару кезегін 6 жылға жуық күтеді екен. Ал Түркияда кезекте жүз мыңдай мұсылмандар тұрса, Өзбекстанда бұл кезекті бес жыл, Тәжікстан мен Қырғызстанда 2-3 жыл күтуде. Тіпті Сауд Арабиясының өзінде Меккеден басқа қалалардан қажылыққа бес жылда бір рет келуге ғана рұқсат етіледі екен.
ҚМДБ-ы жанынан қажылық сапарын ұйымдастырумен айналысатын арнайы Қажылық миссиясы құрылған, биылдан бастап ҚМДБ-ның қажылыққа енгізген бір жаңалығы – бірыңғай үлгіде киім киді. Бұған дейін әр фирма өздері тіктіріп, қажыларымыз әртүрлі киініп баратын. Енді олардың киімі негізінен ақ түсті болады. Әйел адамдардың көк түсті күртешесі бар. Киімнің артында «Қазақстан» деп жазылған. Бір жағында, ҚМДБ логотипі тұрады, екінші жағына әр турфирма өз белгісін қоя алады. Оң жақ иығында Қазақстан туының суреті бейнеленген. Бұл да – үлкен бір жетістік. Мекке, Мәдинаға сапар шегiп, қажылық парыздарын өтеу бақытына ие болған бауырларымыздың қатарында елімiздi мекен еткен 26 ұлттан тұратын отандастарымыз түгел қамтылған. Биыл қажылыққа барған 12-95 жас аралығындағы азаматтар арасында елiмiзге танымал қоғам қайраткерлерi, ғылыми зиялы өкiлдерi, өнер жұлдыздары да бар. Олардың көпшiлiгi қасиеттi Мекке, Мәдинадан оралған соң, жас ұрпаққа рухани тәрбие беруге өз үлестерін қосатын болады»,-деп бітірді өкіл имам Жолдас қажы Қоспақұлы өз сөзін.
Амантай ТОЙШЫБАЙҰЛЫ